فى الحلقة اللى فاتت عرفنا ازاى نجهز نفسنا وبيتنا لاستقبال الشهر الكريم طبعا انتى متوقعة انى هاقولك هاتى حاجتك كلها
واقعدى فصصى وقطعى وحطى فى اكياس ...انا شايفة ان دى حاجة مجهدة جدا ..علشان كده
باقولك استعدى لرمضان من دلوقت علشان توزعى مجهودك على الشهرين ويبقى شعبان
للتحضير ورمضان للعبادة والشئون العادية مهما تكون الظروف.
اول حاجة حددى انواع الخضروات اللى انتى
واسرتك والعائلة الكبيرة بتحبوها وكل ما تيجى تشترى خضار يومى ضاعفى الكمية واعملى
نصها لليوم وباقى الكمية يتم تجميده لرمضان.
بالنسبة للحوم والدواجن لو انتى بتفضلى
المجمد منها يبقى قبل رمضان بيومين اشترى الكمية اللى تكفى الاسبوع الاول فقط وقبل
الاسبوع ما يخلص تعملى حسابك تنزلى تجيبى للاسبوع الجديد اما لو انتى بتفضلى
الدجاج واللحوم الطازجة يبقى انتى مش محتاجة تجمدى حاجة منهم.
وهنحضر اغلب مستلزمات الطبخ ونجهزها فى اكياس
او برطمانات زجاجية (يعنى خلطة البانية –
المكسرات الناعمة للتزيين – المكسرات الخشنة للحشو - علشان كدة احتفظى فى الفترة
الجاية لاى برطمان لانك هتحتاجيه فى رمضان وانا طبعا باتكلم عن البرطمانات الزجاج
مش البلاستيك.
اهم حاجة علشان تبقى مؤهلة نفسيا لوقفة
المطبخ ان المطبخ يكون نظيف جدا يعنى قبل ماتنامى خلى المطبخ زى الفل ولا كوباية
ولا طبق ولا سكينة ولا معلقة بعد السحور من اول يوم علشان تدخلى المطبخ الصبح تبقى
نفسك مفتوحة للشغل.
الحلقة الجاية هاقولك على طرق تجميد الخضروات
وتحضير البرطمانات علشان نبقى دخلنا فى الجد.
كل سنة وانت طيبة .... وان شاء الله معانا هيبقى رمضان السنة دى اجمل وفيه وقت اكبر للعبادة وفى انتظار تعليقاتكم
وطلباتكم وياريت كمان دعواتكم (ابلة شروق)
ليست هناك تعليقات:
إرسال تعليق