ازاى تستعدى للسفر

بقلم / عبير سليمان

طبعا احنا داخلين على موسم الاجازات والمصايف والسفر ولازم نعرف ازاى نستعد للسفر

اهم حاجة  لازم نجهز البيت للعودة بالسلامة ان شاء الله يعنى نرتب البيت علشان لما ترجعى تلاقى البيت نظيف مش محتاج شغل كتير كفاية تعب مشوار الرجوع.

حاولى ماتسيبيش ملابس كتير محتاجة غسيل لانك هترجعى اصلا بملابس محتاجة غسالتين.

وطبعا لازم نتأكد من تأمين البيت داخليا وخارجيا يعنى نقفل محابس المياة والغاز وغلق النوافذ والابواب.

 اذا فيه حد من قرايبك او معارفك ساكن قريب منك وبتثقى فيه جدا ممكن تعملى له نسخة من مفتاح الشقة للطوارئ.

اما الكهرباء على حسب مدة السفر لو طويلة يبقى هتفصلى الثلاجة والديب فريزر وتنضفيهم لكن لو المدة قصيرة يبقى ما تفصليش الكهرباء وممكن تسيبى عيش وجبن ولبن فى الفريزر علشان لما ترجعى ما تحتاجيش تعملى غداء فى يوم العودة.

نيجى بقى لشنط السفر:

 

طبعا المفروض اقولك تعملى قائمة بالاحتياجات اللى تحطيها فى الشنطة بس انتى مش هتعملى كدة يبقى الافضل انك تجهزى شنطة وتسيبيها مفتوحة وكل ما تفتكرى حاجة حطيها فى الشنطة دى.

لازم نتأكد ان الشنط سليمة وعجلها شغال وسليم والسوست شغالة كويس ونحدد عدد الشنط اللى هتحتاجيها  وياريت تكون اقل من عدد افراد الاسرة علشان توزيع الشنط على افراد الاسرة عند التحرك يكون مناسب.

 وكمان نحضر شنطة هاند باج يوضع بها مأكولات خفيفة ومشروبات للسفر إن كان بالسيارة أو الأتوبيس، كما يمكنك وضع كتاب ولعب بسيطة بها لشغل الأبناء أثناء السفر بالإضافة إلى الأدوية المضادة للغثيان.

مشاركة  الاطفال او الشباب فى كل مراحل الاعداد للسفر تكسبهم خبرة واحساس بالمسئولية.

تجهيز الملابس المختارة والمناسبة للسفر والتأكد من نظافتها وسلامتها قبل السفر بوقت كاف.

 اوعى تنسى الأوراق الرسمية الشخصية، بالإضافة إلى أى أوراق خاصة بحجز مكان الإقامة أو تذاكر السفر.

وشنطة صغبرة للطوارئ  يبقى فيها أدوات خياطة بسيطة (إبرة- خيط أبيض وخيط أسود- زر صغير وآخر كبير- دبابيس).

أدوية مضادة للغثيان، لوقف الإسهال، خافض للحرارة، كريمات مضادة لأشعة الشمس وملطفة للبشرة، مطهر ومسكنات للصداع.

وطبعا لو فيه شنطة اسعافات تبقى افضل.

اذا كنتى هتسافرى بالقطار او الاوتوبيس او اى وسيلة غير السبارة الخاصة يبقى الافضل تجيبى استيكر ابيض وتكتبى عليه بعض  البيانات علشان تعرفيها وسط الشنط المسافرين وكمان تبقى مميزة فى حالة فقدها لاقدر الله.

 

مع تمنياتى باجازة سعيدة ورحلة ممتعة........فى انتظار تعليقاتكم وطلباتكم (ابلة شروق)