النهاردة هنتكلم عن اعداد بعض الخلطات اللى بتستعمليها
دايما وهنحطها فى برطمانات زجاج.
هنحضر مجموعه برطمانات زجاج وبعض الورق اللاصق
(استيكرز ) علشان تكتبى عليها محتوى كل برطمان (ممكن تستخدمى الباقى من تيكيت
كراسات الاطفال)
هنبتدى اولا بخلطة الكوردن بلو والبفتيك والبانيه:
وهى عباره عن بقسماط ناعم مع فجيتار العادى وممكن تضيفى الحار لو
انتى بتفضليه ومعاها حبه بهارات وقرفه ناعمه وسمسم وشوفى الملح فى الغالب هتكون
ملحها مظبوط لان الفجيتار غالبا ملحها زائد.
وده اول برطمان عندنا يكون جاهز وحاولى تعملى كميه تكفى رمضان كله.
ثانيا خلطة الدقيق المملح:
هنجيب الدقيق ونحط عليه كل التوابل اللى عندك وكمان مرقه فوريه وبرضه فى برطمان ودى برضه للبانيهات وكمان الفراخ المقرمشه.
وخليها قاعده عندك (دقيق مملح وبعدين البيض وبعدين البقسماط بالفجيتار).
هنجيب الدقيق ونحط عليه كل التوابل اللى عندك وكمان مرقه فوريه وبرضه فى برطمان ودى برضه للبانيهات وكمان الفراخ المقرمشه.
وخليها قاعده عندك (دقيق مملح وبعدين البيض وبعدين البقسماط بالفجيتار).
ثالثاً : خلطة الدقيق المملح مع الرده:
ودى بقى للكبده بالرده هنجيب الدقيق المملح وعليه رده ناعمه بنسب
متساويه.
رابعاً : خلطة السمك المقلى :
عباره عن دقيق مملح بسيط مع نشا جربيها وهتدعيلى.
خامساً: خلطة الفول المدمس
الفول طبق رئيسى فى السحور وخلطته عبارة عن معلقة ملح مع ربع
معلقة كمون وربع فلفل اسود وذرة شطة.
سادساً: خلطة السلطة الخضراء
عباره عن ملح وفلفل وكمون وكسبره وشطه وبهارات مشكله ويمكن اضافة
الخل والليمون والزيت وتعملى كمية تكفى اسبوع وتحطيها فى الثلاجة.
طبعا من الافضل انك تحتفظى
بالبهارات فى مكان جاف لأن الحرارة أو الرطوبة الزايدة بتخلى الأعشاب والبهارات
الجافة تفقد نكهتها بسرعة.علشان كده يا ريت ما تخزنيش الأعشاب والبهارات الجافة بالقرب من أفران الغاز أو المايكروويف أو أي مصدر للحرارة أو الرطوبة زى أجهزة غسل الصحون وغلايات الماء.
وخليكي دايما عارفة إن الأعشاب والبهارات دي لو خزنتيها بشكل صح فده ممكن يخليها تحتفظ بنكهتها لمدة عام أو اتنين.
مع اطيب تمنياتى بالصحة والسعادة .....وفى انتظار تعليقاتكم وطلباتكم ( ابلة شروق)
لمتابعة الحلقات السابقة:
استعدى لرمضان (حلقة 1)
ازاى تستعدى لرمضان ( حلقة 2)
استعدى لرمضان (حلقة - 3 ) طريقة تجميد الخضروات
ليست هناك تعليقات:
إرسال تعليق